DM&R Minister chuan khuarel chhiatna kan tih hi khuarel a ni chiah em? nge keimahni thlenchawp (man-made) zawk?, a ti a. "Mizoram, a bik takin Aizawl khawpuia khuarel chhiatna thleng tam ber hi, keimahni fimkhur loh avanga kan thlentir (man-made) a ni. Chuvangin  leilung chunga kan kutthlak dan hian chhiatrupna thlen kawngah kawngro a su hle tih hre thar i la. Kan bawlhhlawh leh tuichhe paih danah te, kan in sakna tura lei kan laih danah te  mitin I fimkhur tlang ang u," a ti.

Minister chuan Mizoramah chhiatrupna hi a thleng zing ve ta hle mai a, chhiatrupna a lo thlen changa rang taka district hrang hranga DEOC te hmalak dan lo monitor a, State level a ruahmanna siam ngai te lo siamna hmun chu SEOC hi a ni a, a pawimawh hle a ni. SEOC changtlung tak kan han nei mai tur hi ka lawm tak zet a, DM&R  Dept. tan thil chuan chhinchhiah tlak a ni, a ti. 

Minister chuan lirnghinga building dang a lo tluk palh pawhin, SEOC chu a tluk ve a thiang lo tih rilru nena SEOC hi sak tum a ni a, a tha hle tura ngaih a ni, tiin minister chuan Contractor hnenah a tha thei ber anga hna thawk turin a hrilh bawk.

He hun hi R. Vanrengpuia, Director, DM&R in kaihruaiin, H.Lalnunpuia, Sr.EE, Project Div-I, PWD chuan technical report  a pe a. Report a tarlan danin SEOC hi MINECO (Open Gym) bula sak tur niin, a sakna tur sum hi SASCI,2024-2025 atanga hmuh a ni a. Sanctioned Amount  ₹18.50 Crore niin, Contract amount hi ₹14.90 crore a ni thung. A sak hna hi Contractor Nidhi Creative Infrastructure, Silchar, Assam ten an thawk dawn a ni. SEOC hi zopa chhiara chhawng  8(G+7) a ni dawn a, a building pumpui zau zawng hi 4138.50 Sqm a ni. K.Lalrinzuali, IAS, Secretary, DM&R pawhin thu a sawi bawk, niin vawiina sorkar thuchhuah chuan a tarlang.